تبریز : دیلنچی سیز شهر

حیکایه
بو حیکایه نی یازمیرام سنی ناراحات ائده م ، و سنده اولان اینسان سئورلیک ( اومانیستی ) حیسلری یئرسیزجه سینه گوجلندیرم و سن اطرافیندا مینلرجه یالانی و ظلمی گورره رک یاشادیغیمیز دونیانی ایچینده اولان ایده ال دونیا ایله مقایسه ائددیک ده بویوک تناقضلارا یئتیشیب و و او تناقضلاری سیندیره (هضم) ائده بیلمه یه سن و سئویملی دوستلارین بیرینین دئدیی کیمی "بیر گون گلیب گوره کی آقا ، صادق هدایت کیمی انتحار ائدیب."
یازیرام 
چونکی گورورم 
گورورم چونکی دوشونورم
دوشونورم
چونکی وارام
و وارام تا بعضی گوردوکله ریمی گورمه مک اوچون چالیشام و بعضی گورمه دیک لریمی گورمک اوچون.
بعضیلری دئییر شاد یاشاماغین سرری موثبت دوشونمک ده دیر. البته کی منده بو سوزه قاتیلیرام بونا باخمایاراق کی اتیوپی ده و افغانستاندا یاشایان آداملارین چوخی موثبت دوشونه بیلمیللر اما اینانیرام کی اورادا یانلیز موثبت دوشوننلر موثبت عمل ائدیللر.
قره آغاج محله سینه گئده جک دی منیم دوستوم ریضا ، "نصف راه" دا تیرافیکدن چیخیب آذربایجان خیابانینا طرف یولا دوشور ، اوز ذهنیده صاباح نه ایشلر گوره جه یینی تجسم ائدیردی. بیر از گئدن دن سونرا غیر آدی بیر صحنه گورو گوزونون قارشیسیندا (البته بو صحنه لر ایرانین بعضی شهرلرینده غیر آدی ساییلماز) بیر قیز گورو سویوقدان بوزوشوب و آتاسیلان دایانیب یول قیراغیندا تاکسینی گوزله ییر. قیزی او حالدا گوردوکده داها آتاسی گوزونه گلمیر ساخلیر ماشینی.
ریضا: هارایا گئده جک سیز 
قیزین آتاسی : هارا یئتیرسز ، من آذربایجان فلکه سینده دوشه جه یم
ریضا: یاخشی اییله شین ، بو قیزی بو سویوقدا نیه چیخادیب سان ائشیگه
قیزین آتاسی: والله مریض دی من ده مستاجرم ، گلدیم بوردا قارداشیمدان پول آلام دوکتوره آپارام . الله هیچ کسین شانسین یاتیرماسین منیم کی شانسیم یاتیب
ریضا: آپاردین دوکتوره؟
قیزین آتاسی:یوخ قارداشیم گئتمیشدی مراغایا ائوده دئییلدی. گئتدیم اربابیم گیله اودا ائوده دئییلدی
ریضا: نه ایش گوررسن؟
قیزین آتاسی: بازادا باشماخچی شاگردییم حاج علی یه ایشله رم.
ریضا: خانم قیز آدین نه دی؟
قیز: شبنم
ریضا: درس اوخویورسان
شبنم : هه 
ریضا: نئچه نی 
شبنم: چهارم اوخویورام
بیردن قاباقداکی ماشین سرعتین آزالدیر و ریضا آیاقین قویور ترموزا.
قیزین آتاسی: آمان یاواش مواظب اولون ، ده یر ها
ریضا:قورخما هیچ زاد اولماز. هارایا گئده جک سیز دئیین تئز یئتیرم
قیزین آتاسی: یئکه توکاندا بیر دوستوم وار گمانیم اونا گئدیر ، گئدیب اوندان پول آلیم قیزی آپاریم دکتوره.
ریضا کیشینین معتاد اولدوغونا اول ماشنا میندیکدن شک ائله میشدی. اما بیر اصل اونون ذهنینده همیشه وارایدی کی ، هیچ واخت اینسانلارین ظاهرلرینه باخیب قضاوت ائله مسین. ائله بو اصل اساسیندا ایسته دی کیشینی سیناییب مطمئن اولسون.
ریضا: شبنم خانیم نه یین دی؟
قیزین آتاسی: والله آغا بوغازی چیرک ائله ییب اوسکورو. خلطیندان قان گلیر. قیزیم اوسکورمه ها ! آغانین ماشینی قانلی اولار شرمنده اولاریق.
بو سوزلرله قیزین یادینا سالماق ایسته ییردی کی باشلا اوسکورمه یه ، اما چوخ دا "سوغانچاسین چوخ ائله میردی" چونکی ریضا کارگاهدان چیخمیشدی و ایش پالتارلاری قره یاغ ایچینده ایدی و پوللو آداملار کیمین گورسه نمیردی.
شبنم اوسکورمه یه باشلادی. 
ضبطین سسی چوخ اولدوغونا گوره اوسکورمه سسی ائشیدیلمیردی. و شبنم ده ایکی ده نه اوسکورمه یه کیفایت ائله دی.
اردی وار....